Bayaan Saxaafadeed 11.11.2006

Salaasada oo ay bishan Noofambar tahay 14, 2006da, in ka badan boqol qof ayaa ka qayb-geli doonta Shirweyne uu qaban-qaabinayo Akaademigu oo lagu soo af-jarayo laba sannadood oo cilmi-baadhis ahaa.

Bishii Noofambar 2004tii, Akaademiga Nabadda iyo Horumarku wuxu ku qabtay Ambassador Hotel Shirweynihii Koox-hawleedka Qaran ee Akaademiga oo ay ka soo qayb-galeen ergooyin boqol ku dhow oo ka kala socday: Hay'adaha Dawladda, Golayaasha Qaranka, Xisbiyada Siyaasadeed, Komishanka Qaranka, bulshada rayidka ah iyo Gobollada dalka. Waxa kale oo ka soo qayb-galay hay'ado iyo ururro caalamiya oo ay ugu mudnayd Hay'adda WSP oo immika la baxday Interpeace oo ah ta maal-gelisa Akaademiga.

Shirweynahaas oo uu furay Madaxweyne-ku-xigeenka Jamhuuriyadda Somaliland Mudane Axmed Yuusuf Yaasiin, wuxu socday muddo laba maalmood ah oo uu Akaademigu ku soo bandhigay qoraallo kooban oo ka hadlayay cilmi-baadhis hordhac ahayd oo uu ka sameeyay mowduucyo saamayn Qaran lahaa. Shirweynahaas markii mowduucyadaa la falanqeeyay, wuxu Shirweynahaasi Akaademiga faray in uu cilmi-baadhis qoto dheer ku sameeyo saddex mowduuc oo kala ahaa:

1. Doorashada Golaha Wakiillada,
2. Xiisadaha Kheyraadka dabiiciga ah,
3. Xukun-daaddejinta,

Akaademigu markii uu muddo laba sannadood ah ka hawl-galay saddexdaa mowduuc ee kor ku xusan iyada oo is-kaashi lagala sameeyay: Xukuumadda, Golayaasha qaranka, Xisbiyada Siyaasadda, Komishanka Qaranka, bulshada rayidha ah, maamullada Gobollada iyo Degmooyinka, Golayaasha Degaanka iyo dhammaan daneeyayaasha wuxu ka soo saaray saddex qoraal iyo saddex filim. Haddaba si dawlad iy dadweynaba loogu soo bandhigo natiijooyinka ka soo baxay cilmi-baadhistaa qotoda dheerayd ee Akaademigu waday muddada labada sannadood ah, waxa Ambassador Hotel lagu qaban doonaa 14-15/11/2006 Shirweynihii 2aad ee Koox-hawleedka Qaran ee lagu soo bandhigayay qoraalladaa iyo filimmadaa. Filimmadu waa lix, saddex af-Soomaali ah iyo saddex af-Ingiriisi ah. Qoraalladuna waa saddex af-Ingiiriisiya oo mid waliba leeyahay Guud-mar kooban oo af-Soomaali ah. Boodhka, maamulka iyo hawl-wadeennada Akaademigu waxay soo dhaweynayaan ka-qayb-galayaasha Shirweynaha iyaga oo u mahad-naqaya dhammaan intii la soo hawl-gashay.

Akaademiga oo Interpeace kaashanaya, Cilimi-baadhistan waxa taakuleeyay deeq-bixiyayaasha kala ah: Denmark, DfID (UK), Komishanka Yurub, Finland, Italy, Norway, Sweden, Switzerland iyo USAID.

» Press Release in English

» Home